Sərbəst güləş üzrə yığmamız Sloveniyadan vətənə qayıdıb.

Offsideplus.az xəbər verir ki, milli komandamız Avropa çempionatında 1 qızıl, 1 gümüş və 4 bürünc medalla komanda hesabında Avropa çempionu olub. 

Baş məşqçi Xetaq Qazyumov təəssüratlarını bölüşüb:

“Avropa çempionatına yaxşı hazırlaşmışdıq. 3 təlim-məşq toplanışı keçmişdik. Rusiya və Azərbaycanda bütün hazırlıq mərhələlərini tamamladıq. Bu nəticə təsadüfi deyil. Avropa çempionu olmamıza baxmayaraq, medalların kəmiyyət və keyfiyyətinə görə, daha yüksək nəticə qazanacağımıza inanırdıq. Osmandan da çempionluq gözləyirdik. Zəif çıxış edən güləşçilərimiz oldu. Səhvlərin üzərində işləyəcəyik. Ümid edirəm ki, həmin güləşçilər növbəti dəfə bu səhvlərə yol verməyərək yüksək nəticələrə imza atacaqlar”.

Debüt etdiyi böyüklərin Avropa çempionatında ilk medalını qazanan (bürünc) Ağanəzər Novruzov isə yarışdakı çıxışını belə dəyərləndirib:

“Şükürlər olsun, bu nəticəni əldə etdim. Amma səhvlərim çoxdur. Onların üzərində işləməliyəm. Bir az səhvlərdən, bir az da təcrübəsizlikdən yarımfinalda məğlub oldum. Məşqçilər bu il hansı yarışlarda məsləhət bilsə, o yarışlarda da iştirak edəcəyəm. Qələbəmi bütün sevdiyim insanlara həsr edirəm”.   

Xatırladaq ki, Avropa çempionatında təmsilçilərimizdən Giorgi Meşvildişvili (125 kq) qızıl, Osman Nurmaqomedov (92 kq) gümüş, İslam Bazarqanov (57 kq), Əli Rəhimzadə (65 kq), Kənan Heybətov (74 kq) və Ağanəzər Novruzov (74 kq) isə bürünc medal qazanıb