Rusiyada keçirilən dünya çempionatı penaltilər sayı ilə tarixə düşüb. 

Offsideplus.az xəbər verir ki,  ötən gün keçirilən İran – Portuqaliya matçının 53-cü dəqiqəsində Kriştiano Ronaldonun yararlana bilmədiyi penalti mundialda sayca 19-cu olub. Bununla da, DÇ-2018 indiyə qədər keçirilmiş bütün mundialları penalti sayına görə qabaqlayıb. İran – Portuqaliya matçının son dəqiqələrində birincilərin qola çevirdiyi penalti isə 20-ci olub. 20 penaltidən 15-i qolla nəticələnib.

Bundan əvvəl İtaliya (1990), Fransa (1998), eləcə də  2002-ci ildə Cənubi Koreya və Yaponiyanın birgə təşkil etdiyi mundiallarda 18 penalti qeydə alınmışdı.

DÇ-2018-də penalti rekordunun qeydə alınmasında ilk dəfə mundialda tədbiq edilən  VAR sisteminin rolu böyükdür. Çünki 20 penaltidən 7-si videotəkrara baxıldıqdan sonra təyin edilib.(qol.az)