Xəbər verdiyimiz kimi, Azərbaycan millisi dekabrın 18-də və 19-da Ukrayna yığması ilə yoldaşlıq oyunları keçirəcək.

Offsideplus.az Azərbaycan Futzal Federasiyasının rəsmi saytına istinadən xəbər verir ki, statistikaya nəzər yetirsək, komandaların indiyə qədər 3-ü rəsmi olmaqla 5 oyunda qarşılaşdıqlarını görə bilərik.

Rəsmi qarşılaşmalardan ilk duel Macarıstanda baş tutub. 2010-cu ildə keçirilən və millimizin debüt etdiyi Avropa çempionatının ¼ final mərhələsindəki oyunun əsas və əlavə vaxtı 3:3 hesabı ilə başa çatıb. Qalibi müəyyənləşdirmək üçün penaltilər seriyasından istifadə olunub ki, millimizin üzvləri daha dəqiq olublar – 4:2. Nəticədə komandamız yarımfinala çıxıb. Tərəflərin növbəti qarşılaşması DÇ-2012-nin seçmə mərhələsində baş tutub. Bakıda keçirilən qrup oyununda qələbəni futzalçılarımız qazanıb – 4:2. Bu komandalar 4 il sonra yenidən üz-üzə gəliblər.

Bu dəfə AÇ-2016-nın seçmə mərhələsində və oyun bu dəfə də paytaxtımızda təşkil olunub. Həmin vaxt qrupda Belçika və Danimarkadan güclü olan millimiz Ukrayna ilə görüşdə yenilmişdi 2:3. Yoldaşlıq oyunları isə beynəlxalq turnirlər çərçivəsində baş tutub. Burada tərəflər hərəyə bir qələbə qazanıb. Bakıdakı ilk dueldə millimiz 3 cavabsız qolla qalib gəlib. Sonrakı görüşdə isə sevinən tərəf qonaqlar olub.
25.01.2010. AÇ. Azərbaycan – Ukrayna – 3:3 pen. 4:2 /Macarıstan/

08.02.2011. BT. Azərbaycan – Ukrayna – 3:0 /Azərbaycan/

18.12.2011. DÇSO. Azərbaycan – Ukrayna – 4:2 /Azərbaycan/

15.01.2012. BT. Azərbaycan – Ukrayna – 2:3 /Azərbaycan/

21.03.2015. AÇSO. Azərbaycan – Ukrayna – 2:3 /Azərbaycan/