"Arsenal"ın ulduz yarımmüdafiəçisi Deklan Rays Çempionlar Liqası çərçivəsində keçirilən "Atletiko Madrid"lə qarşılaşmadan sonra hakimə qarşı səsləndirdiyi tənqidi fikirlərə görə intizam məsuliyyətinə cəlb oluna bilər.
Offsideplus.az xəbər verir ki, matçın son dəqiqələrində ləğv edilən qalmaqallı penalti qərarından sonra hakimliyə açıq şəkildə etiraz edən ingiltərəli futbolçu indi UEFA-nın radarına düşüb. Rays oyunsonu açıqlamasında meydan sahiblərinin azarkeş təzyiqinin və stadiondakı atmosferin hakimin qərarına təsir etdiyini iddia edib.
Futbolçunun çıxışı hakimin obyektivliyini və dürüstlüyünü şübhə altına alan hərəkət kimi qiymətləndirilir.
Əgər ittihamlar təsdiqlənərsə, Deklan Rays bir neçə oyunluq diskvalifikasiya edilə bilər.
Bu cəza Raysın cavab qarşılaşmasında, hətta "Arsenal" mərhələni keçərsə, final oyununda iştirakını sual altına qoyur.
"Hakimin qərarlarını şübhə altına almaq intizam qaydalarının ciddi şəkildə pozulması deməkdir." — UEFA-nın rəsmi nümayəndələrinin ilkin rəyi bu yöndədir.
