"CBC Sport" kanalı sosial şəbəkə hesabları vasitəsi ilə bəyanat yayıb.
Offsideplus.az xəbər verir ki, qurum Azərbaycan Basketbol Liqası ilə bağlı qərar qəbul edib. Məlumatı diqqətinizə çatdırırıq:
"Əziz və çox hörmətli idmansevərlər!
“CBC Sport” telekanalı fəaliyyətə başladığı gündən Azərbaycanda idmanı və sağlam həyat tərzini təbliğ etməyə çalışır. Bunun üçün müxtəlif layihələr və çəkilişlər həyata keçiririk. Bu 9 il ərzində bir çox beynəlxalq və ölkədaxili yarışları müasir standartlara cavab verən səviyyədə - ən yüksək keyfiyyətlə çəkib ölkə idmansevərlərinə çatdırmışıq. Bu mənada basketbol üzrə ölkə çempionatının yayımının təşkil edərək basketbola ölkədə yenidən marağın yaradılmasına çalışırıq. Bu işləri bizim telekanala güvənib etibar edən Azərbaycan Basketbol Federasiyası ilə birgə aparırıq. Bu etibara və güvənə görə federasiya rəhbərliyinə təşəkkür edirik.
Yeni mövsümdən etibarən basketbol üzrə ölkə çempionatının oyunlarının bəziləri həftəsonu keçirildiyindən həmin qarşılaşmaları yayımlamaq bizim telekanal üçün çətin olur. Lakin ilk gündən Azərbaycan Basketbol Federasiyası ilə birlikdə ölkəmizdə bu idman növünə bir xeyli azalan marağın artmasına çalışdığımızdan və bu işlərin nəticəsini gördüyümüzdən hesab edirik ki, mümkün qədər çox oyunun yayımlanması lazımdır. Bütün bunları düşünüb “CBC Sport” telekanalının yayımlaya bilməyəcəyi oyunların “İdman TV” tərəfindən çəkilib göstərilməsinə müsbət yanaşdığımızı bəyan edirik. Lakin Azərbaycan Basketbol Federasiyasının əsas yayımçı partnyoru qalaraq oyunların seçimi və bu kimi digər məsələlərdə üstünlük “CBC Sport” telekanalında qalacaq.
Fəaliyyət göstərdiyimiz 9 il ərzində yayım siyasətindən bir qədər kənara çıxmağımızda məqsəd Azərbaycan idmanı və basketboluna faydalı olmaq, bu idman növünə marağı bir qədər də artırmaq, kütləviliyə nail olmaqdır. Onu da qeyd etmək istəyirik ki, bu istisna haldır və gələcəkdə əməkdaşlıq edəcəyimiz digər idman qurumlarının təşkil edəcəyi yarışların yayımı ancaq “CBC Sport” tərəfindən aparılacaq. Dost “İdman TV” telekanalına qarşıdakı yayımlarda uğurlar arzulayırıq. Azərbaycan Basketbol Federasiyasına bizim imkanları nəzərə alıb bu təklifimizi qəbul etdiyi üçün minnətdarlığımızı bildiririk.
Hörmətlə "CBC Sport"!
