“Neftçi” klubu Qəbələ toplanışını davam etdirir.

Offsideplus.az xəbər verir ki, “ağ-qaralar” bu gün Qəbələ şəhər stadionunda növbəti məşqə çıxıb. Fiziki, toplu və taktiki çalışmalardan ibarət olan məşqdə əməliyyatdan sonra bərpa prosesini başa vuran Eddi İsrafilov da iştirak edib. O, komandadan ayrı, fərdi məşğul olub.

Qeyd edək ki, toplanışa sabah yekun vurulacaq. Səhər məşqindən sonra Bakıya qayıdacaq komanda “Araz-Naxçıvan”la matçın hazırlığını paytaxtda davam etdirəcək. Naxçıvan təmsilçisi ilə oyun sentyabrın 16-sı saat 18:00-da “Dalğa Arena”da keçiriləcək. "Neftçi" 5 turdan sonra 8 xalla turnir cədvəlində 3-cü yeri tutur.