Misli Premyer Liqasının 16-cı turunda "Kəpəz" "Zirə"yə məğlub oldu - 0:4.

Offsideplus.az xəbər verir ki, oyundan sonra qonaqların çalışdırıcısı Rəşad Sadıqov mətbuat konfransında iştirak etdi. 

Mütəxəssis qələbə haqda bunları söylədi:

"Matç gərgin və sərt başladı. Bilirdik ki, "Kəpəz" bizə qarşı aqressiv oyun nümayiş etdirəcək. Birinci hissə asan keçmədi. İki gözəl qol vurduq. Hesabın böyük olmasına baxmayaraq, "Kəpəz" daim hücum etməyə çalışırdı. Son zamanları oyunları çox yaxşı alınırdı. Buna görə də qarşılaşmaya diqqətli hazırlaşmışdıq. Vacib qələbə qazandıq. Futbolçularımı təbrik edirəm".

Çalışdırıcı komandanın son oyunlarda hücum xəttindəki futbolçuların yaxşı performans sərgiləməsindən də danışdı:

"Son 3 matçda yox, ümumiyyətlə, hücum xəttindəki futbolçularımdan razıyam. Sadəcə, əvvəlki oyunlarda istədikləri alınmırdı. Ümid edirəm ki, qarşıdakı matçlarda da stabilliyi qoruya biləcəklər. Qarşıda 2 çətin matçımız var. Bu oyunlarda da əlimizdən gələni etməliyik ki, qələbə qazanaq".