"Kəpəz" milli komandaların beynəlxalq oyunları ilə əlaqədar Misli Premyer  Liqasında yaranacaq fasilə üçün planları müəyyənləşib. Belə ki, "sarı-göylər" sentyabrın 20-də ölkə çempionatında "Sumqayıt"la oyundan sonra 4 günlük istirahətə yollanacaqlar.

Offsideplus.az xəbər verir ki, sentyabrın 25-də klubun bazasına toplaşacaq futbolçularımız məşqlərini Gəncə Şəhər Stadionunun ehtiyat meydançasında davam etdirəcək. Baş məşqçi Azər Məmmədov yetirmələrini yoxlama matçlarında da sınaqdan keçirəcək. 

Bu məqsədlə oktyabrın 2-də iki oyun keçiriləcək. Komandamız həmin gün saat 12-də Azərbaycanın 19 yaşadək futbolçulardan ibarət yığması ilə qüvvəsini sınayacaq. Saat 17-də isə rəqib I Liqa təmsilçisi "Gəncəbasar" olacaq. "Kəpəz"in məşqçi korpusu bütün futbolçuların oyununu izləmək üçün heyəti iki yerə ayıracaq. Hər iki qarşılaşma Gəncə Şəhər Stadionunun ehtiyat meydançasında baş tutacaq.

Onu da qeyd edək ki, "sarı-göylər" Misli Premyer Liqasındakı fasilədən sonra ilk görüşünü VII tur çərçivəsində oktyabrın 9-da səfərdə "Araz-Naxçıvan"a qarşı keçirəcək.