İordaniyanın Amman şəhərində keçirilən güləş üzrə U-17 dünya çempionatında bu gün 45, 51, 60, 71 və 92 kq-da yer alan yunan-Roma güləşçiləri mübarizəyə qoşulub.

Offsideplus.az xəbər verir ki, Əmrah Əmrahov (48 kq) ukraynalı Boqdan Makarovetsə 3:1 hesabıyla qalib gəlsə də, 1/4 finalda iranlı Armin Şamsipourhacıya uduzub – 0:8. Əmrah təsəlliverici görüşdə bolqarıstanlı Kaloyan İvanova heç bir şans tanımayıb – 9:0. Əmrahov qazaxıstanlı Yedige Toleutayevi də 3:1 hesabıyla üstələyərək dünya üçüncüsü olub.

Şahid Nəbiyev (45 kq) misirli Mohamed Eltayebə tam üstünlüklə (9:0) qalib gəlsə də, 1/4 finalda ermənistanlı Marat Atşemyana (0:9) məğlub olub. Nəbiyev təsəlliverici görüşdə iranlı Əhməd Badraddini ilə güləşəcək.

Turan Daşdəmirov (51 kq) hindistanlı Sainat Pardi (5:1), amerikalı Domenik Munaretto (9:0) və qazaxıstanlı Yerassil Mussana (4:1) qalib gələrək ardıcıl ikinci dəfə dünya çempionatının finalına yüksəlib. Daşdəmirov həlledici görüşdə qırğızıstanlı Kutman Kalbayevlə üz-üzə gələcək.

Ayxan Cavadov (60 kq) ukraynalı Vadim Matrosla (4:3) gərgin keçən görüşdə sevinən tərəf olub – 4:3. Həmyerlimiz qazaxıstanlı Dosbol Şamili (2:2) xalların keyfiyyətinə görə üstələyib. Cavadov yarımfinalda amerikalı dünya çempionu Pol Raniyə də 2:1 hesabıyla qalib gələrək adını finala yazdırıb. Ayxan titul uğrunda gürcüstanlı Vaxtanq Lolua ilə mübarizə aparacaq.

Yusif Əhmədli (71 kq) türkiyəli Kuzey İldemə tam üstünlüklə (8:0) qalib gəlsə də, 1/4 finalda rusiyalı Vladislav Bırlyaya sonuncu xal prinsipinə əsasən (1:1) məğlub olub. Əhmədli təsəlliverici görüşdə amerikalı Jozef Jeterlə güləşəcək.

Səid Paşayev (92 kq) yunanıstanlı Nikolaos Kavananosa tam üstünlüklə (8:0) qalib gəlsə də, 1/8 finalda türkiyəli Süleyman Bakıra “tuş”la uduzub.