NBA-nın əfsanəvi oyunçusu Kris Boş bu ilin əvvəlində həyatını təhlükəyə atan ciddi sağlamlıq problemi ilə üzləşdiyini açıqlayıb.

Offsideplus.az xəbər verir ki, Basketbol Şöhrət Zalının üzvü yanvar ayında ağciyər arteriyasının tromboemboliyasına görə bir həftə xəstəxanada qaldığını bildirib.

"Yanvarda məndə çox ağır bir hal baş verdi. Demək olar ki, həyatımı itirdim və yenidən həyata döndüm. Zarafat etmirəm. Yenidən ağciyər arteriyasında tromboz oldu. Bu, bu ilin yanvarında baş verdi. Bir həftə xəstəxanada qaldım", – deyə Boş HoopsHype-a müsahibəsində vurğulayıb.

Qan laxtalanması ilə bağlı problemlər Kris Boşda ilk dəfə 2015-ci ildə aşkarlanıb və bu səbəbdən o, demək olar ki, basketbol oynamağı dayandırıb, 2019-cu ildə isə karyerasını rəsmi olaraq bitirib. 

O, karyerası ərzində 11 dəfə NBA Ulduzlar Oyununda iştirak edib və "Mayami Hit"in heyətində iki dəfə liqa çempionu olub.