Peşəkar Futbol Liqası (PFL) "Turan" klubunun Misli Premyer Liqasının  XXIV turu çərçivəsində "Şamaxı" ilə oyunun təxirə salınması ilə müraciətinə cavab verib. 

Offsideplus.az qurumun rəsmi saytına istinadən xəbər verir ki, matçın VAR sisteminin yoxluğuna görə başqa vaxta keçirilməsi mümkünsüz olub.

“CBC Sport” telekanalının əməkdaşları və VAR maşını dünənki matçlarla əlaqədar oyun günü səfərə yollandığından təhlükəsizlik səbəbindən geri qayıtmalı oldular. VAR sisteminin olmaması və oyunun yayımlanmaması görüşün keçirilməsi üçün əngəl ola bilməz. Dəfələrlə ölkəmizdə, eləcə də dünyanın bir çox çempionatlarında VAR-ın çalışmamasının şahidi olmuşuq, amma qarşılaşma dayandırılmayıb. Və ya havanın dumanlı olması səbəbindən televiziya vasitəsilə tamaşaçıların izləməsi demək olar mümkünsüz hala gəlsə də, aşağı qatda, yəni meydançanın üzərində, hakimin görüş məsafəsində heç bir problem olmadığından oyun davam etdirilib" - deyə PFL-in yaydığı açıqlamada bildirilir.

Qurumun cavabında qeyd olunub ki, oyunun təxirə salınması ilə bağlı qərarı meydançanı nəzərdən keçirən, topun hərəkətini, hava şəraitinin futbolçuların sağlamlığına zərər vurma ehtimalını olub-olmadığını nəzərə alan baş hakim verir.

PFL rəhbərliyi mövsümün sonunda da bəzi oyunlarda VAR sisteminin olmayacağını nəzərə çatdırıb: "İdman prinsiplərinin qorunması əsas tutularaq, çempionatın son turlarında avrokuboklara yollanma və aşağı liqaya düşmə ehtimalı olan komandalar üçün həssaslıq nəzərə alınaraq, bütün oyunlar eyni gündə və eyni saatda start götürür. Bu zaman isə oyunların bəziləri “CBCSport” kanalı vasitəsilə canlı yayımlanmır və VAR sistemi tətbiq olunmur. Eyni hal bu mövsümün də sonunda yaşanacaq".