"Real Madrid"in prezidenti Florentino Perez "El Chiringuito"ya müsahibə verib.

Offsideplus.az xəbər verir ki, o, İspaniya futbolunun ən parlaq gənc ulduzu Lamin Yamal haqqında danışarkən həm rəqibinin oyunçusuna yüksək qiymət verib, həm də "Barselona" ilə olan münasibətlərin acınacaqlı vəziyyətini bir daha vurğulayıb.

Perez 18 yaşlı istedadın oyununa heyranlığını gizlətməyib. O, gənc futbolçunun potensialını yüksək qiymətləndirərək bildirib:
"Lamin Yamalı bəyənirəm? Əlbəttə ki, onu bəyənirəm! O, futbol üçün böyük bir istedaddır və bunu inkar etmək qeyri-mümkündür."

Lamin Yamalın "Real Madrid"ə transferi ehtimalı barədə verilən suala Perez gülərək cavab verib və bunun hazırkı şəraitdə qeyri-mümkün olduğunu qeyd edib:
"Onu transfer etmək? "Barselona" ilə münasibətlərimiz tamamilə qopub."

Perezin "münasibətlər tamamilə qopub" ifadəsi təsadüfi deyil. İki klub arasındakı "soyuq müharibə"nin bir neçə əsas səbəbi var.

Perezin son günlərdə "Barselona"nı hakim korrupsiyasında ittiham etməsi və klubun 14 titulunu şübhə altına alması münasibətləri bərpaolunmaz dərəcədə zədələyib.

"Barselona" rəhbərliyinin Perezi məhkəməyə verməyə hazırlaşması tərəflər arasındakı bütün diplomatik körpüləri yandırıb.

Uzun illərdir iki klub arasında bir-birinin oyunçularını transfer etməmək barədə olan "centlmen razılaşması" (Luis Figo hadisəsindən sonra yaranan gərginliyi azaltmaq üçün) artıq rəsmi düşmənçilik müstəvisinə keçib.