"Real Madrid"in baş məşqçisi Joze Mourinyo Vinisius Junioru klubun yeni layihəsinin əsas oyunçularından biri kimi görür.

Offsideplus.az xəbər verir ki, AS nəşrinin məlumatına görə, 63 yaşlı portuqaliyalı mütəxəssis braziliyalı futbolçunun klubla müqaviləsinin uzadılmasında mühüm rol oynayıb. Mourinyo və Vinisius 2026 Dünya Çempionatı zamanı bir neçə dəfə söhbət ediblər və onların arasında ilk gündən qarşılıqlı anlaşma yüksək səviyyədə olub.

Vinisius üçün özünü layihənin əsas hissəsi kimi hiss etmək, dəyərli və vacib olduğunu bilmək xüsusi əhəmiyyət daşıyıb. Mourinyo ona bu hissi verib və gələcəkdə də Vinisiusa güvənəcək. Baş məşqçi "Real Madrid"də məhz Vinisiusun ətrafında komanda qurmaq niyyətindədir.

Mourinyo üçün Vinisiusun oyunların taleyini təkbaşına dəyişmək bacarığı və daim hücumda fəallığı önəmlidir. Portuqaliyalı mütəxəssis qarşısına məqsəd qoyub ki, Vinisiusun 2024-cü ildəki, "Qızıl top"a yaxın olduğu dövrdəki ən yaxşı formasını geri qaytarsın və komandanı elə formalaşdırsın ki, həm Vinisius, həm də hücumçu Kilian Mbappe meydanda bir-birini tamamlasın və fərdi ulduzlar kimi deyil, vahid kollektiv kimi çıxış etsinlər.