Offsideplus.az xəbər verir ki, bu barədə Bakı Şəhər Halqası Əməliyyat Şirkəti (BŞH) məlumat yayıb.

Bildirilib ki, fevralın 20-dən etibarən “Formula-1 Qatar Airways” Azərbaycan Qran-prisi üçün “early bird” erkən bilet satışına start verir. Azarkeşlər seçilmiş tribunalara 20 faizədək endirim fürsətindən eksklüziv olaraq “Baku City Circuit” mobil tətbiqi üzərindən faydalana biləcəklər. Kampaniya martın 5-dək davam edəcək.

Bilet əldə edən azarkeşlərə 3 günlük tribuna biletləri ilə yanaşı, Pit zolağı gəzintisi bileti də təqdim ediləcək. Beləliklə, hər kəs sevimli F1 komandasını, pilotları və onların qarajlarını yaxından izləmək şansı qazanacaq.

Sentyabrın 13-15-də baş tutacaq “Formula-1” Qran-prisinə ölkəmiz 8-ci dəfə ev sahibliyi edəcək. Yarış həftəsində keçiriləcək əyləncə proqramları ilə bağlı məlumat mütəmadi olaraq azarkeşlərin və ictimaiyyətin diqqətinə çatdırılacaq.

Ötən ilki azarkeş marağını və Azərbaycan Qran-prisinə biletlərin vaxtından öncə tamamilə satılmasını nəzərə alaraq, sürət həvəskarlarını zaman itirmədən, öz biletlərini “Baku City Circuit” mobil tətbiqindən güzəştli qiymətlərlə əldə edə bilərlər. Bundan əlavə, mobil tətbiq vasitəsilə istifadəçilər nəticələr, yarış həftəsində keçiriləcək əyləncə proqramları və trek ətrafı yolların açılması və bağlanması ilə bağlı bildirişləri ilk əldə edəcəklər.

Qeyd edək ki, “Baku City Circuit” mobil tətbiqini iOS və Android əməliyyat sistemləri üzərindən endirmək mümkündür.