Tovuz futbolunun yetirməsi və hazırda "Keşlə"də çıxış edən Amil Yunanov DÇ-2022-nin seçmə mərhələsində millimizin çıxışı, karyerası və ölkə futbolunda baş verən hadisələr barədə Offsideplus.az-ın suallarını cavablandırıb...

– Millimizin DÇ-2022-nin seçmə mərhələsindəki çıxışını necə dəyərləndirərdin?

– Ürək açan nəticələrimiz olmadı. Amma qrupda yaxşı oyunlar keçirdik.

– Canni de Byazinin yığmamız üçün hansısa bir xeyir verdiyini düşünürsən?

– Ola bilər ki, yaxşı nəticələri olmadı. Ancaq məşqçi kimi təcrübəli biridir. Çox çalışdı ki, milli üçün nəsə etsin.

– Sənin fikrincə, millini yerli mütəxəssis çalışdırmalıdır, yoxsa əcnəbi?

– Yerli mütəxəssis olsa, daha yaxşı olar.

– Mətbuatda Rəşad Sadıqovun adı yığmamız ilə hallanır. Səncə, bu seçim uğurlu olar?

– Əlbəttə, Rəşad Sadıqov millimiz üçün xeyir verər.

– Yenidən milliyə qayıtmaq barədə düşünürsən?

– Gərək öz klubumda daimi oynaya biləm ki, yığmaya da dəvət alam. Əsas heyətdə çıxış etməyəndə itib-batırsan. Milli komandaya dəvət almaq və o formanı geyinmək hər bir kəsin arzusudur.

– "Keşlə"dəki hazırkı durumundan razısan?

– Xeyr! Ehtiyatda gününü keçirən futbolçu hazırkı durumundan razı ola bilməz.

– Bir müddət klubsuz qaldın. Bunun səbəbi nə idi? Təklif gəlmirdi, yoxsa şərtlər səni qane etmirdi?

– Bunun səbəbi çoxdur. Lakin o günlərə qayıtmaq istəmirəm. Təklif də gəlmirdi.

– Növbəti mövsümdən "Keşlə"nin adı dəyişdiriləcək və Şamaxını təmsil edəcək. Bu, regionlarda futbolumuzun inkişafına təkan verəcək?

– Klublarımızın sayı regionda nə qədər çox olsa, daha yaxşıdır. İnşallah, təki futbolumuz inkişaf etsin.

Cavid Əliyev