Həftəsonu keçirilmiş matçlarla futbol üzrə Azərbaycan çempionatının 2024/2025-ci illər mövsümünün 15-ci turu başa çatdı.
Hesabat turunda turnir cədvəlində bəzi dəyişikliklər oldu. Offsideplus.az 15-ci turun yaddaqalan məqamlarını sizə təqdim edir:
"Araz-Naxçıvan" - "Turan Tovuz" 1:0
Bu qarşılaşma taktiki mübarizə şəraitində cərəyan etdi. Nəqşicahan təmsilçisi oyunun böyük hissəsində üstünlüyü əlində saxlayaraq minimal hesablı qələbə əldə etdi. Müdafiədə sıx oynayan Elmar Baxşıyevin komandası əsasən əks-hücumlarla rəqibinə problemlər yaratdı. Qələbəni gətirən qol isə ikinci hissədə vuruldu və bu nəticə ilə "Araz- Naxçıvan" müvəqqəti də olsa, zirvəyə yüksəldi. Bu, kubok görüşünü də nəzərə alsaq, naxçıvanlıların ardıcıl 6-cı qələbəsi olaraq yadda qaldı. "Turan Tovuz" isə artıq 4 oyundur 3 xal qazana bilmir. Kurban Berdıyevin yetirmələri son 4 turda 3 heç-heçə edib, 1 məğlubiyyətə üzülüblər.
"Sabah" - "Səbail" 1:0
Yeddi oyun idi 3 xala həsrət olan "Sabah" nəhayət ki, uğursuz gedişata yeni baş məşqçisi Vasili Berezutski ilə son qoydu. Elə ötən həftə istefaya göndərilmiş Krunoslav Renduliçi əvəz edən rusiyalı mütəxəssisin debütü uğurlu alındı. Bu qələbə "Sabah"ın üst sıralardan daha da uzaqlaşmamasına yardımçı oldu. Amma komanda hazırda 22 xalla 5-ci sıradadır. Son 6 çempionat matçında cəmi 1 heç-heçəsi olan, yeni baş məşqçisi Cavid Hüseynovun rəhbərliyi altında da məğlubiyyətləri sıralayan "Səbail"in çöküşü isə davam edir.
"Şamaxı" - "Kəpəz" 0:1
Bu tura qədər çempionatın aşkar autsayderi olan "Kəpəz" Azər Bağırovun rəhbərliyi altında daha bir sürprizə imza atdı. "Şamaxı"nı səfərdə tək qolla üstələyən Gəncə təmsilçisi "Səbail"in növbəti məğlubiyyətindən də istifadə edərək "kanalizasiya"dan çıxdı. Ayxan Abbasovun çalışdırdığı "Şamaxı" isə artıq 8 oyundur ki, qələbə nə olan anlayışdır onu bilmir. Əyalət təmsilçisi bu görüşlərdə cəmi 2 heç-heçə edib, 6 məğlubiyyətlə barışıb.
"Zirə" - "Sumqayıt" 4:1
Bu turda ən məhsuldar oyun "Zirə" və "Sumqayıt" qarşılaşmasında qeydə alındı."Zirə" ardıcıl 3 məğlubiyyətin ardından uğursuz gedişata son qoya bildi. Vaqif Cavadovun gəlişindən sonra heç də pis təsir bağışlamayan "Sumqayıt" isə ən ağır məğlubiyyətini məhz "qartallar"dan aldı.
"Neftçi" - "Qarabağ" 0:3
Turun mərkəzi qarşılaşması "Qarabağ"ın birmənalı üstünlüyü ilə yekunlaşdı. Ağdam təmsilçisi yüksək səviyyəli oyununu nümayiş etdirdi. Qələbə sayəsində "Qarabağ" yenə zirvədəki mövqeyində qərarlaşdı.
