Bu gün Azərbaycan milli komandası Millətlər Liqasının 6-cı turu çərçivəsində səfərdə İsveçin qonağı olacaq. 

Offsideplus.az xəbər verir ki, İsveç yığmamız üçün tanış rəqibdir. Ona görə ki, Azərbaycan yığması bu kollektiv ilə indiyə qədər 5 matçda qarşılaşıb. Bu oyunlarda rəqibin böyük üstünlüyü var. Millimiz bir, Skandinaviya təmsilçisi isə dörd qələbə qazanıb. İndiyədək heç-heçə etməyən rəqiblər heç vaxt yoxlama oyununda üz-üzə gəlməyiblər. Bütün matçlar rəsmi turnirlər çərçivəsində olub. Azərbaycan və İsveç yığmalarının oyunları məhsuldarlığı ilə də diqqət çəkir. 5 görüşdə 16 qol vurulub ki, bunlardan 4-nə yığmamız, 12-nə rəqib nail olub. 3-cü dəfə İsveçə səfər edən yığmamız səfərdən quru və böyükhesablı məğlubiyyətlə dönüb - 0:3, 0:5.