Argentinada hələ də Dieqo Maradonanın yoxluğu ilə barışa bilmirlər. Milyonların sevimlisi hər imkanda anılır.

Offsideplus.az xəbər verir ki, bu dəfə yerli çempionatın "Boka Xuniors" - "Nyuells Old Boyz" qarşılaşması ciddi marağa səbəb olub. Azarkeşsiz keçirilən oyunda rəhmətliyin vaxtilə formasını geydiyi iki komanda qarşılaşıb. Matç xüsusi məqamlarla yadda qalıb deyə, oyunun özü arxa lana keçib. 

Hər iki komandanın üzvləri və hakimlər meydana arxasında "Maradona" yazılan, qarşısında rəhmətliyin silueti olan milli formalarda çıxıblar. 

Oyunda istifadə olunacaq top və Maradonanın "Boka"da geyindiyi "10" nömrəli futbolka meydana oyuncaq maşınla gətirilib.

Hakimin start fitindən bir neçə saniyə əvvəl meydanın mərkəz dairəsinə Dieqonun iri həcmli şəkli yerləşdirilib. 

90 dəqiqə ərzində stadiondakı bütün reklam lövhələrini və bannerləri Maradonanın şəkilləri bəzəyib.

"Boka"lılar oyunboyu arxalarındakı məşhur soyadla top dalınca qaçıblar.

Ən təsirli an görüşün 12-ci dəqiqəsində yaşanıb. Meydan sahiblərinin kolumbiyalı yarımmüdafiəçisi Edvin Kardona cərimə zərbəsindən möhtəşəm qol vurandan sonra komanda yoldaşları ilə birgə Maradonanın lojasına tərəf qaçıb. Dieqo artıq orda yox idi. Orda olan onun böyük qızı Dalma idi.

Futbolçular Argentina millisinin formasını çıxararaq alqışlayıblar. Bunu görən Dalma özünü saxlaya bilməyərək göz yaşlarında boğulub. Dalmanı yanındakı həyat yoldaşı sakitləşdirib.

Oyun "Boka Xuniors"un 2:0 hesablı qələbəsi ilə başa çatıb. Hakimin final fitindən sonra futbolçular "Life is life" mahnısının sədaları altında yenidən Dalmanın əyləşdiyi lojaya tərəf gəliblər. Məşhurun qızı göz yaşlarını içində komandaya təşəkkür edib.