“Keşlə”nin yarımmüdafiəçisi Felipe Santosun Offsideplus.az-a müsahibəsi...

- Komandada özünü necə hiss edirsən?

– Yaxşı hiss edirəm. Xoşbəxtəm və komandanı bu vəziyyətdən çıxarmaq üçün əlimdən gələni edəcəm.

– Mövsümün sonunda “Keşlə”dən ayrılacaqsan?

– Düzünü desəm, dəqiq bilmirəm. Hazırda bütün diqqətimi mövsümü yaxşı başa vurnağa yönəltmişəm. Gələcəyin necə olacağını görəcəyik.

– Azərbaycanın mədəniyyətinə uyğunlaşa bilirsənmi?

– Əlbəttə, özümü evimdəki kimi hiss edirəm. Azərbaycanı, insanlarını, mədəniyyətini sevirəm. Burada yaşayan hər kəs üçün ən yaxşısısını arzulayıram.

– Azərbaycanın digər klublarından transfer təklifi almısan?

– Xeyr! Hər oyunda əlimdən gələni edirəm. Bilirəm ki, yaxşı mövsüm keçirsəm, böyük işlər ortaya çıxacaq.

– Ölkəmizin mətbəxində ən çox sevdiyin yemək hansıdır?

– Kabab çox xoşuma gəlir. Ədviyyatlarınız yaxşıdır. Sevdiyim yemək yoxdur. Bəlkə də bir gün mənim də sevdiyim yemək olar.

– Bilirsən ki, növbəti mövsümdən klubunuzun adı dəyişəcək və Şamaxını təmsil edəcək. Bu haqda fikrin nədir?

– Bu qərar məni təəccübləndirdi. Amma ümid edirəm ki, bu, azarkeşlərin kluba olan sevgisinə təsir etməyəcək. Bu hadisə komandamıza kömək edəcəksə, ən yaxşı şəkildə edilsin.

– Komandada ən yaxın dostun kimdir?

– Aldair Neto. Eyni dildə danışmağımız münasibətlərimizi asanlaşdırır. Hamıyla ünsiyyətim əladır. Həmişə hörmətimi qoruyuram.

– Bizim liqadakı hakimlərin səviyyəsindən razısanmı?

– Fikir bildirmək çətindir. İnanıram ki, daha yaxşı olacaq. VAR sistemi olsaydı, çempionata daha da kömək edərdi.

Cavid Əliyev