İspaniya La Liqasında ötən həftə hansı hadisələrlə yadda qalıb? Offsideplus.az rəsmi tərəfdaşımız La Liqa-ya istinadən "Real Sosyedad"ın kubok qazanmasından tutmuş Ezekiel Avilanın dönüşünə qədər TOP-10 faktı diqqətinizə çatdırır.

İspaniyada klub futbolu uzun müddətdir ki, təxirə salınan İspaniya Kuboku finalı ilə azarkeşlərin hüzuruna gəldi. Gərgin keçən ötən həftə, zədələr və müqavilə yeniləmələri ilə də yadda qaldı...

"Real Sosyedad" 34 ildən sonra ilk kubokunu başı üzərinə qaldırdı.

2019-20 mövsümünün təxirə salınan İspaniya Kuboku finalı nəhayət baş tutdu. "Real Sosyedad" və "Atletik" komandaları arasında baş tutan Bask derbisində minimal hesablı qələbə qeydə alındı. 1:0 hesabıyla qalib gələn "Real Sosyedad" 1987-ci ildən sonra ilk böyük titulu qazandı.

Qeyd edək ki, La Liqanın 29-cu turunda "Real Sosyedad" və "Atletik" komandaları bu gün Bakı vaxtı ilə saat 23:00-da bir daha qarşılaşacaq.

Benzema mart ayının oyunçusu seçildi.

La Liqada mart ayının ən yaxşısı mükafatını keçirdiyi 3 oyunda 5 qola imza atan Kərim Benzema əldə etdi.

La Liqada liderlik mübarizəsi qızışır.

29-cu turda "Real"ın "Eybar" üzərində qələbəsi, "Atletiko"nun "Sevilya"ya məğlub olması və "Barselona"nın "Valyadolid"ə qalib gəlməsi turnir cədvəlində ilk pillə uğrunda mübarizəni əməlli başlı qızışdırıb. Hazırda 66 xalla lider olan "matrasçılar"ı "Barsa" qarabara izləyir (65 xal). "Real" isə 63 xalla üçüncüdür. Bu şənbə baş tutacaq "El Klasiko"nun nəticəsinin turnir cədvəlində "partlayış" təsiri yaradacağına əmin ola bilərik.

Naço Monrealdan yeni müqavilə.

35 yaşlı müdafiəçi İspaniya Kubokunu qazanmaqla tək komandasına yardım etməklə kifayətlənmədi, həmçinin "Real Sosyedad"la yeni anlaşma imzaladı. Monreal 2022-ci ilədək Baskoniya təmsilçisində çıxış edəcək.

Jerar Morenonun La Liqada ilk het-triki.

Aprelin 3-də baş tutan "Qranada" - "Vilyarreal" matçında Moreno ev sahiblərini 3 qolla məyus etdi. Bu, 29 yaşlı hücumçunun La Liqada ilk het-trikidir. Bu mövsüm vurduğu qolların sayını 19-a çatdıran Moreno bombardirlik yarışında Lionel Messi ilə ilk pilləyə şərik oldu.

Ezekiel Avila 435 gündən sonra yaşıl meydanlara qayıtdı.

Ötən həftə keçirilən "Osasuna" - "Xetafe" oyunu (0:0) Ezekiel Avilanın uzun müddətdən sonra futbola geri dönməsi ilə yadda qaldı. Hər iki dizindən ciddi zədələr alan Avila, 435 gündən sonra yenidən yaşıl meydanlara qayıtdı.

Serxio Ramosdan "Real"a bəd xəbər.

Bu həftə "Real" kapitanı Serxio Ramosun bir müddət də oynamayacağı xəbərini aldı. 34 yaşlı müdafiəçi aprel ayının sonunadək Madrid təmsilçisinə yardım edə bilməyəcək.

"Hueska" klubu 61-ci yaşını qələbə ilə qeyd etdi!

Martın 29-da "Hueska" yaranmasının 61-ci ilini qeyd etdi. 5 gündən sonra "Levante" ilə qarşılaşan komanda səfərdən 2:0 hesablı qələbə ilə qayıtdı. Bu qalibiyyət "Hueska"nın turnir cədvəlinin son pillələrindən qurtulmağına imkan yaratdı. Paçetanın rəhbərlik etdiyi komanda hazırda  20 komanda arasında 24 xalla 18-cidir.

Aleks Kollado ilə yeni anlaşma.

"Barselona" B komandasının kapitanı Aleks Kollado ilə müqavilənin müddətini uzatdı. 21 yaşlı hücumameyilli yarımmüdafiəçi 2023-cü ilə qədər Kataloniya təmsilçisində çıxış edəcək. Futbolçunu gələn mövsümdən etibarən əsas komandaya çağırılacağı gözlənilir.

Futbol üzrə U-21 İspaniya yığma komandası Avropa Çempionatının 1/4 finalına yüksəldi.

Qrup mərhələsinin son oyununda Çexiya yığması ilə qarşılaşan ispanlar 2:0 hesablı qələbə ilə adlarını 1/4 finala yazdırıb. "Levante" klubunun şərəfini qoruyan Dani Qomes komandasının qələbə qollarının müəllifi olub.