Ülvi İsgəndərov “Qəbələ” klubunda 100-cü oyununu keçirib.

Offsideplus.az xəbər verir ki, 26 yaşlı hücumçunun yubileyi Misli Premyer Liqasının XXIV turuna təsadüf edib.

O, “Səbail”lə səfər matçına start heyətində çıxıb. Ülvi 2:2 hesabı ilə başa çatan görüşdə 85 dəqiqə meydanda olub.

“Qırmızı-qara” formada 100 oyun keçirən forvardın hesabında 19 qol var. O, Premyer Liqada 86 (15 qol), kubokda 10 (4 qol), avrokuboklarda 4 dəfə meydana çıxıb. İsgəndərov “Qəbələ”nin tarixinə 100 və daha çox oyunda iştirak edən 12-ci futbolçu kimi düşüb.

Xatırladaq ki, İsgəndərovun debütü 2017-ci noyabrın 29-da baş tutub. O, Azərbaycan kubokunun “Mil-Muğan”la görüşündə meydana çıxıb və qol hesabını da açıb.