“Neçə gün idi ki, püşkdə hansı komanda ilə düşəcəyimizi gözləyirdik".

Offsideplus.az xəbər verir ki, bu sözləri "Qarabağ" klubunun baş məşqçisi Qurban Qurbanov Ağdam təmsilçisinin mətbuat xidmətinə açıqlamasında Çempionlar Liqasının 1-ci təsnifat mərhələsinin püşkünü dəyərləndirərkən deyib.

Bu mərhələdə Cəbəllüttariq "Linkoln"u ilə qarşılaşacaq Ağdam təmsilçisinin çalışdırıcısı rəqibi belə qiymətləndirib:

“Linkoln” Cəbəllütariq çempionudur və bəzən belə komandaların püşkdə çıxması insanlara və futbolçulara mane olur, rəqibi o qədər də ciddiyə almırlar. Amma bizim illərdir ki, Avropada təcrübəmiz var, illərdir bu cür komandalara qarşı oynayırıq. Elə ən çətin qarşılaşmalarımız da belə komandalara qarşı olur. Başda mən olmaqla, əsas da ilk turlarda diqqətli olmalıyıq. Bu rəqibə qarşı əvvəlki illərdəkindən daha ciddi yanaşmalıyıq".

Mütəxəssis "Linkoln"la matçlara ciddi hazırlaşacaqlarını vurğulayıb: İllərdir bu işin içindəyik. Bu gün futbol tam dəyişib. Bütün ölkələr, komandalar futbol oynamağı bacarır. Üzərimizə böyük məsuliyyət düşür. İnşallah, çalışacağıq ki, ilk oyuna komandanı fiziki, taktiki və psixoloji cəhətdən tam hazır edək. Bugünkü məlumata görə, rəqib oyunlarını süni örtüklü meydanda keçirir. Bu da ola bilsin ki, bizə əlavə çətinlik yaratsın. Belə meydanlarla, belə oyunlarla daha əvvələr də üzləşmişik. İlk oyun səfərdə olduğu üçün həddindən artıq diqqətli yanaşacağıq. Çalışacağıq ki, azarkeşlərimizi sevindirək”.

Xatırladaq ki, birinci mərhələnin oyunları isə 11/12 iyul və 18/19 iyulda olacaq. "Qarabağ" ilk görüşü səfərdə, cavab oyununu evdə keçirəcək.