“Qarabağ” klubunun baş məşqçisi Qurban Qurbanov Azərbaycan Premyer Liqasının 3-cü turu çərçivəsində “Neftçi” ilə keçirilən qarşılaşmadan sonra mətbuat konfransına qatılıb.
Offsideplus.az xəbər verir ki, təcrübəli mütəxəssis qarşılaşma haqqında bunları deyib:
“Düşünürəm ki, çox maraqlı oyun alındı. Futbolçularımı təbrik edirəm. Neçə gün idi ki, birlikdə deyildik, narahat idim. Oyunumuz istədiyimiz kimi olmasın, amma düşündüyümdən daha yaxşı oynadıq. Premyer Liqamızda bu qədər azarkeş qarşısında çoxdandır oynamırdıq. Azarkeşlərə də təşəkkür edirəm. Çox maraqlı, qarşılıqlı qollarla dolu oyun oldu".
Təcrübəli mütəxəssis daha sonra jurnalistlərin suallarını cavablandırıb:
- Kifayət qədər güclü heyət buraxmışdınız. Bu, “Bazel”lə oyuna mane olmaz ki?
- Çempionatda fasilə yarananda, futbolçular idman formasından uzaqlaşır. Çoxlu sayda oyunçumuz millilərin düşərgəsində idilər. Futbol kollektiv oyundur, ona görə də birlikdə oynamaqları üçün bu heyəti buraxdım. Əlbəttə, yorğunluq var idi, tam heyətlə cəmi 1 məşq etmişdik. Yeganə çıxış yolumuz bu gün meydana optimal heyəti buraxmaq idi. Meydança da ağır idi, ola bilər yüklənmə çox oldu.
- Son 15 dəqiqədə “Neftçi” fərqlənməyə çox yaxın idi.
- Məğlub olan komanda riskə gedir. Bu riskin qarşısında bir neçə əks-hücum təşkil etdik, bu epizdolardan fərqlənmək lazımdır. Sadəcə sonda dəqiq zərbə çatmırdı. Bir qədər yorğunluq da var idi. Tural Bayramlı və Kevin Medinanın zədələri var idi. Bəzi epizodlarda səhvlərə yol verdik. Bu səhvləri edəndə sevinirəm. “Bazel”lə oyundan əvvəl bu səhvləri analiz edəcəyik və həmin futbolçular daha diqqətli olacaqlar.
- “Bazel”lə oyunda hücum xəttində kimə güvənəcəksiniz - Vadjiyə yoxsa Şeydayevə?
- Bilmirəm. Qarşıda bir neçə gün var fikirləşdməyə.
- İbrahima Vadjinin oyunu haqqında nə deyə bilərsiniz?
- Mahir gedəndən sonra hücumçu axtarırdıq. Xeyli futbolçu ilə razılaşmışdıq, amma sonda alınmırdı. Vadji fərqli çempionatdan gəlib, amma çox istəkli futbolçudur və bu gün 2 qol vurdu və müdafiə xəttini təziqdə saxladı. Bəzi çatışmayan cəhətləri var, onları da aradan qaldıracağıq. Yaxında daha yaxşı Vadji olacaq.
