Son günlər ölkə ərazisində müşahidə olunan qarlı və şaxtalı hava şəraiti Lökbatan Olimpiya İdman Kompleksinin infrastrukturuna ciddi ziyan vurub.

Offsideplus.az Peşəkar Futbol Liqasının rəsmi saytına istinadən xəbər verir ki, aparılan müşahidələrdən sonra Azərbaycan Birinci Divizionunun XV turunun “Qaradağ Lökbatan” – “Neftçi-2” oyununun martın 1-də bu arenada keçirilməsinin mümkünsüzlüyü müəyyənləşib.

“Qaradağ Lökbatan”ın müraciətini, “Neftçi-2” klubunun razılıq məktubunu alan PFL oyunla bağlı aşağıdakı qərarı qəbul edir:

XV turun “Qaradağ Lökbatan” – “Neftçi-2” oyunu 1 mart saat 14:00-da Türk Hava Yolları Futbol Mərkəzinin IV meydançasında keçirilsin və görüş “Neftçi-2” – “Qaradağ Lökbatan” kimi qeyd olunsun.

I Divizionun XXIII turunun “Neftçi-2” – “Qaradağ Lökbatan” oyunu “Qaradağ Lökbatan” – “Neftçi-2” kimi qeyd olunsun.