"Qrup mərhələsində ilk matçımıza çıxacağıq. Həmişə qrupda oynamağı istəmişik. Bu, tam başqa turnirdir. Belə oyunlarda özümüzü yaxşı tərəfdən göstərmək istəyirik. İnanıram ki, sabah futbolçular ağıllı oyun göstərəcəklər. Bunu onlara güvənərək deyirəm. Belə komanda ilə görüşdə istəkli olmaq çox vacibdir".
Offsideplus.az Sport24.az-a istinadən xəbər verir ki, bu fikirləri "Qarabağ"ın baş məşqçisi Qurban Qurbanov İsveçrə "Bazel"inə qarşı Bakıda keçirləcəkləri Konfrans Liqasının qrup mərhələsinin I tur oyunundan əvvəl mətbuat konfransında deyib.
49 yaşlı mütəxəssis bildirib ki, son vaxtlar İsveçrə futbolu tam fərqli səviyyəyə çatıb: "Dünən "Yanq Boyz" "Mançester Yunayted"ə qalib gəlib. Bu, həmin ölkənin futbolunun səviyyəsini göstərir və bizə tanışdır".
"Yanq Boyz"un çox sürətli oyun sərgilədiyini söyləyən Qurbanov rəqibin bombardiri olan hücumçusu Artur Kabralın çıxışını fərqləndirib: "Bu komanda müdafiədən hücuma cəld çıxır. Əvvəlcə hər bir kollektivin oyun sistemini analiz edir, daha sonra fərdi oyunçulara keçirik. Komanda oyunu çox vacibdir. Həm hücumda, həm də müdafiədə bir-birimizə yaxın olmalıyıq. Futbolçularımız hər futbolçuya yaxın olacaq. Kabral cərimə meydançasında daha çox təhlükəlidir. Müdafiəçilərimiz onu yaxından tanıyacaqlar. İnanıram ki, hər oyunçu üçün yaxşı diqqət ayrılacaq".
Təcrübəli mütəxəssis "Qarabağ"ın "Neftçi" ilə qarşılaşmada çox güc sərf etdiyini vurğulayıb: "İstəyirəm ki, bütün oyunlarımız bu səviyyədə keçsin. Oyunçular meydan amilinə görə daha çox güc sərf etməli oldu. Bu gün komandada bir az yorğunluq var. Amma hər bir halda onların durumuna görə məşq proqramı qurmuşuq. Sabah səhər də məşqimiz olacaq. Qrupdakı ilk oyunda yorğunluq haqqında çox düşünməməliyik. Bu, əlimizdə səbəb olmamalıdır. İllərdir ki, bu rejimdə oynayırıq. Mikrozədələri olan futbolçularımız var. Sabah komandanın matça tam heyətlə hazır olacağına inanıram".
Qurbanov millinin oyunlarından sonra futbolçularda psixoloji çətinliklərin yaşandığını da diqqətə çatdırıb: "Qarabağ"ın futbolçuları digər komandaların oyunçularından daha çox matça çıxırlar. Futbolçuların nə qədər istirahət etmələri də önəmlidir. Milli, çempionat və avrokubok tam başqa səviyyədir. Avrokubokda oynamayanda çempionat oyunlarına köklənmək daha asan olur. Belə amillər məni narahat edir. Psixoloji yorğunluq fiziki yorğunluğa da gətirib çıxarır. Onlar özlərini maksimum göstərməyə çalışırlar. Bu, futbolçuların borcudur".
Qurbanov "Neftçi"ni 2:1 hesabı ilə yendikləri Azərbaycan Premyer Liqasının III tur matçında dubl edən İbrahima Vadji barədə isə bunları deyib: "Vadji son matçda yaxşı oynadı. Bu o demək deyil ki, o, istədiyim oyunu sərgiləyib. Hər şeyi edəcəyik ki, İbtahima daha yaxşı oyun göstərsin və kollektivə uyğunlaşsın. Tam fərqli çempionata gəlib. Onun fiziki gücündən və istəyindən razıyam. Bəzi komponentləri yaxşılaşdırmalıyıq. İnanıram ki, bu işguzarlıqla çatışmayan cəhətləri arxada qoyacaq. Bu gün "Qarabağ"dakı bütün futbolçulara inanıram. Onlarla fərdi söhbətlərim olur".
