Braziliya millisi və PSJ-nin futbolçusu Neymar tərəfindən təqdim edilən “Red Bul Neymar Jr’s Five” futbol turniri növbəti dəfə Azərbaycanda təşkil olunacaq. 

Offsideplus.az xəbər verir ki, iştirakçı komandaların müraciətləri nəzərə alınaraq, yarışın tarixləri dəyişdirilib. Belə ki, seçim mərhələləri 12 sentyabrda Gəncə şəhərində, 28-29 avqust və 4-5 sentyabr tarixlərində Bakıda keçiriləcək.

Azərbaycan üzrə qalibin məlum olacağı final mərhələsi isə 19 sentyabrda Bakıda baş tutacaq.

Qeyd edək ki, "Red Bul Neymar Jr’s Five" futbol turnirində iştirak etmək istəyənlər onlayn qeydiyyat mərhələsindən keçməlidir. İştirakçı yerlər məhdud olduğundan qeydiyyata tələsməyi xahiş olunur. Gəncə seçimləri üçün qeydiyyat sentyabrın 10-da yekunlaşacaq.

Xatırladaq ki, Red Bul Neymar Jr’s Five – dünyanın hər bir tərəfindən futbol həvəskarlarını birləşdirən “beşin beşə” qlobal futbol turniridir. Bu il 6 qitədən olan 60-dan çox ölkədə seçim mərhələləri təşkil olunacaq. Yarışlarda öz ölkələrindəki finalın qalibi olacaq komandalar dünya finalında iştirak hüququ qazanacaq. Yarışda yeddi nəfərdən ibarət olan komandalar iştirak edə bilər, oyunçular 18-35 yaş arası olmalıdırlar.

Reqlamentə əsasən turnirdə hər oyun 10 dəqiqə davam edir. Rəqibin qapılarına hər vurulan qol, rəqibin komandadan bir oyunçunu meydandan uzaqlaşdırır. Oyun, komandalardan birinin son oyunçusunun meydandan uzaqlaşdırılmasına və ya matçın vaxtı bitənə qədər davam edir. Oyunun sonunda oyunçu sayı daha çox olan komanda qalib gəlir.