Ukraynalı jurnalist Konstantin Andriyuk "Astana"nın baş məşqçisi Roman Qriqorçukun komandadan müvəqqəti ayrılmasının səbəbini açıqlayıb.

Offsideplus.az "tribuna.com" saytına istinadən yaydığı xəbərə görə, "ToTaTake" şousunun aprıcısı bildirib ki, təcrübəli mütəxəssis Qazaxıstan çempionunu ailə məsələlərinə görə tərk etməyib: 

"Qriqorçukun hazırda nə şəxsi, nə də ailəvi problemləri var. O, klub rəhbərliyi ilə fikir ayrılığına görə "Astana"nı tərk edib. Onun komandaya nə vaxt qayıdacağı hələlik bilinmir".

Qeyd edək ki, ötən mövsümün sonunda "Qəbələ"dən ayrılan Qriqorçuk iyun ayında "Astana"ya baş məşqçi təyin olunub.

Qol.az-ın əldə etdiyi xəbərə görə isə Qriqorçuk "Astana"da fəaliyyətə başladığı ilk günlərdən futbolçularla yola getməyib. Davamlı mübahisə və münaqişələrdən sonra futbolçular kütləvi halda klub rəhbərliyi qarşısında seçim qoyub - ya o, ya da biz. Bundan sonra "Astana" rəhbərliyi Qriqorçukla yolları ayırıb. Amma ukraynalı mütəxəssis kluba yeni gəldiyindən onun istefaya göndərilməsi haqda açıqlamanın verilməsi məqsədəuyğun sayılmayıb. Bu səbəbdən Qriqorçukla müqavilənin ləğv edilməsi barədə rəsmi xəbərin yaxın vaxtlarda veriləcəyi gözlənilir. Amma son anda tərəflərin ümumi razılığa gələcəyi və Qriqorçukun "Astana"da fəaliyyətini davam etdirəcəyi də istisna olunmur. (qol.az)