​"Yuventus"un serbiyalı hücumçusu Duşan Vlahoviç karyerasında yeni səhifə açmağa hazırlaşır.

Offsideplus.az xəbər verir ki, 26 yaşlı forvardın yay transfer pəncərəsində əsas hədəfi Avropanın iki nəhəngindən birinə keçməkdir.  

​Vlahoviçin nümayəndələrinin artıq hər iki klubla təmasa keçdiyi və futbolçunun bu keçidlərə yaşıl işıq yandırdığı bildirilir. Serbiyalı ulduz hətta bu klublarda başlanğıcda ehtiyat oyunçu statusu ilə razılaşmağa da hazırdır.  

• ​"Bavariya": Münhen təmsilçisi Harri Keynin yanına alternativ hücumçu axtarışındadır. Lakin son məlumatlara görə, alman klubu bu transferi maliyyə baxımından "çox baha" hesab edir və hələlik rəsmi addım atmayıb.  

• ​"Barselona": Kataloniyalılar isə ilk növbədə Robert Levandovskinin gələcəyi ilə bağlı qərar verməlidirlər. Əgər polşalı ulduz komandadan ayrılarsa, Vlahoviç "göy-qırmızılar" üçün bir nömrəli hədəfə çevrilə bilər.  

​Hazırda Turin klubunda çətin mövsüm keçirən (A Seriyasında cəmi 4 qol) Vlahoviç üçün müqavilə yeniləmə danışıqları dayanıb. "Yuventus"un futbolçuya mövsümlük maaşını 12 milyon avrodan 7 milyon avroya endirməyi təklif etdiyi, lakin tərəflərin hələ razılığa gəlmədiyi deyilir.  

​İndi bütün gözlər "Bavariya" və "Barselona"nın yayda atacağı rəsmi addımlara çevrilib.