"Neftçi" klubu Azərbaycan millisinin üzvü Höccət Haqverdinin mümkün transferi üzərində çalışır.

Offsideplus.az xəbər verir ki, "Traktor" klubu ilə vidalaşan 29 yaşlı mərkəz müdafiəçisinin "Neftçi"yə keçidi gerçəkləşmək üzrədir. Klubun Media, Marketinq və İctimaiyyətlə Əlaqələr Departamentinin rəhbəri Rüstəm Allahverdiyev saytımıza açıqlamasında danışıqların davam etdiyini bildirib:

"Hazırda Höccətlə danışıqlarımız davam edir. Ümid edirik ki, müsbət yekunlaşacaq. Razılıq əldə edilib, rəsmi müqavilə imzalanan zaman bu barədə mətbuata açıqlayacağıq".

Qeyd edək ki, "Transfermarkt" saytında Höccət Haqverdi "ağ-qaralar"ın futbolçusu kimi qeyd olunub.

Höccət Haqverdi 2021-ci ildən Azərbaycan millisinin formasını geyinir. O, 2021-2022-ci illərdə "Sumqayıt" klubunun şərəfini qoruyub.