Uels Futbol Federasiyası bu ölkənin milli komandasının üzvlərinə AÇ-2020 zamanı qolf oynamağa icazə verməyəcəyini açıqlayıb.
Offsideplus.az xəbər verir ki, federasiyanın baş katibi Conatan Ford Britaniya mətbuatına açıqlamasında baş məşqçi Rayan Giqqzin də bu qərarı dəstəklədiyini bildirib:
“Bəzi futbolçularımızın qolfa olan sevgisini normal qarşılayıram. Amma AÇ-2020 zamanı diqqətli olmalıyıq. Onların qolf oynamalarına icazə verməklə sağlıqlarını və qitə birinciliyinə konsentrasiyasını riskə ata bilmərik. Baş məşqçi Rayan Giqqz də bu qadağanı dəstəkləyir. O, turnir ərzində bütün fikrimizin yalnız futbolda olmasını istəyir”.
Image result for bale golf
Madrid “Real”ında forma geyinən Qaret Beyl başda olmaqla bəzi uelsli futbolçuların qolf oynamağa böyük marağı var. Beylin AÇ-2020-yə vəsiqəni təmin etdikləri oyundan sonra üzərində “Uels. Qolf. Madrid. Bu sıra ilə” sözləri yazılan bayraq açması “Real” azarkeşləri tərəfindən narazılıqla qarşılanmışdı.
Uels yığması AÇ-2020-də Türkiyə, İtaliya və İsveçrə ilə bir qrupda mübarizə aparacaq. Bu qrupda İtaliya yığmasının iştirakıyla baş tutacaq oyunlar istisna olmaqla, digər görüşlər Bakıda keçiriləcək.