Azərbaycan ağırlıqqaldıranı Valentin Xristov 2012-ci il London Yay Olimpiya Oyunlarında qazandığı bürünc medaldan məhrum edilə bilər. 

Offsideplus.az Beynəlxalq Ağırlıqqaldırma Federasiyasının rəsmi saytına istinadən xəbər verir ki, 24 yaşlı idmançının dopinq-testinin təkrar analizi müsbət nəticə verib.

Bolqarıstanlı legionerin sidik analizi zamanı qadağan olunmuş dehidroxlorometiltestosteron aşkarlanıb. Bundan başqa, Meline Daluzyan (Ermənistan), Nikolay Novikov (Belarus), Aleksey Toroxti (Ukrayna) və Ruslan Nurudinovun (Özbəkistan) təkrar dopinq-testinin nəticəsi müsbət çıxıb. Adıçəkilən bütün idmançılar yarışlardan kənarlaşdırılıb.

Qeyd edək ki, Valentin Xristov 2012-ci il London Yay Olimpiya Oyunlarında 56 kq çəki dərəcəsində bürünc medal qazanıb. O, 2013-cü ildə orqanizmindən dehidrometiltestestoron maddəsi aşkarlandığı üçün 2 il, 2015-ci ildə isə nandrolon tapılması səbəbindən 8 il müddətinə bütün yarışlardan kənarlaşdırılıb. Xristov 2013-cü il Avropa çempionatının qızıl, 2015-ci il dünya çempionatının bürünc medalından məhrum edilib.